全城熱爆的國藥控股（1099）昨日掛牌，最高見過19.74元，之後全程捱沽，以近全日最低位18.52元收市，比招股價16元，僅高15.8%，表現梗係令唔少捧場散戶大感失望！
星俠一向對抽新股無興趣，所以對任何新股都無乜感覺。今日中國中冶（1618）上市，以其A股近日表現咁曳，昨日暗盤價亦跌穿招股價，估計獲配股份人士難逃輸錢命運。
昨日國藥成交達65.2億元，而大市總成交只得585億元，反映市況十分淡靜。呢款悶局不利炒作，後市將遇壓力。逆市創新高的股份有比亞迪（1211）及雨潤食品（1068），前者收報71.3元，升3.8%，後者漲5.7%，高收16.98元，有糊真係要識食。
雨潤半年純利上升37%至8.41億元，唔少大行睇好豬肉加工業，惟股價9月以來累升近30%，想買貨應趁調整時出手，吼16元水平買，中線目標20元，以14.50元止蝕。
方星俠