英乙諾士郡近月係威係勢，7月尾搵咗名帥艾歷臣做總監諗住大搞，點知原來都係一間「謀人寺」，呃呃氹氹「昆」咗蘇甘保入局，搞到呢位前英國腳離開呢支「英乙爛隊」，踢過一場即劈炮！
話說蘇甘保喺上月26日免費簽咗諾士郡，睇嚟當時都係被艾歷臣游說加盟，又話球會好有前景、好多巨星陸續有嚟等。點知蘇甘保後來發覺球會貨不對辦，講過嘅嘢唔算數；於是，佢上周六踢咗一場英乙後，據講到周二操練時就同隊友講拜拜，執包袱鬆人。
誤信艾歷臣空頭支票
我求大俠記得艾歷臣上任做總監時，承諾會簽大牌球員返嚟幫球會逐級爭升班；繼上月尾免費簽得蘇甘保後，又傳卡路士、龍格保、韋利同簡奴等過氣巨星好快加盟，點知都係吹水多，冇件嚟到。
上周六諾士郡喺英乙作客摩爾甘比，輸1:2；場波蘇甘保踢足90分鐘，但唔知係咪輸波冇癮，萌生去意。
蘇甘保早前同諾士郡簽約5年，加盟嗰陣佢話希望每季都幫球會升班，逐級上直頭打到英超為止，係佢加盟呢間英乙球會嘅心願同目標；之但係蘇甘保越踢越覺得唔妥，球會講嘢唔算數之外，諾士郡家陣仲俾聯賽會查緊，懷疑佢哋早前轉班主係咪合法，同埋幕後資金來源，總之麻煩陸續有嚟啦！
唔在乎4萬鎊周薪
家蘇甘保厭戰都係人之常情，雖則佢袋緊4萬鎊（約51萬港元）周薪，喺英乙屬超級高薪一族；但講真，蘇甘保大把身家，當初諾士郡承諾有野心佢先肯加盟，我求大俠就覺得蘇甘保好有骨氣就真！
你有你走，諾士郡都唔打算留呢位35歲老將；球會發言人話：「佢已經走咗喇，我哋祝佢一帆風順。」蘇甘保今次俾艾歷臣跣咗一鑊，當然谷住道氣，但呢位前英主帥一於好少理，繼續喺諾士郡搵銀歎世界！