阿仙奴周二晚2:0淘汰西布朗，喺英聯盃第3圈晉級，表面睇各建一功嘅山齊士華特同卡路士韋拿係最大功臣，尤其墨西哥小將卡路士韋拿傷癒今季第一次幫兵工廠後備上陣，都有波入；不過唔可以唔提「幕後」功臣韋舒亞；開賽初段其實阿仙奴俾英冠「1哥」西布朗「㩒住打」，不過37分鐘，韋舒亞（左）俾對手中場謝路美湯馬士（中）踢跌，韋舒亞口噏噏挑釁呢位前兵工廠青訓產品，結果謝路美湯馬士嬲嬲哋醒佢一巴掌，當然換來球證紅牌一張，阿仙奴憑多打一人優勢先贏波。其實過去阿仙奴都有唔少擅於挑釁對手嘅中場，好似韋拉同基拔圖施華，韋舒亞果然接到棒。同日利物浦由尼高治入波贏列斯聯1:0。