盛傳因打「大老虎」太出色而招惹不滿，令續約一事拖延嘅證監會法規執行部董事施衛民（MarkSteward，圖），原本任期今日結束，但喺幾乎執包袱返家鄉嘅一刻，終於獲財政司司長發出一紙續約書，留任3年，而佢同事證監會營運總裁簡俊傑亦獲延任9個月至明年7月中。
華華聽小道消息講，Mark哥份合約原先糾纏嘅「原則」問題已經解決，但內容就要留番明年出年報先知。截至今年3月底止年度，施衛民總年薪係554萬港紙，按年僅微升2.6%，但今年佢越戰越勇，先喺電盈（008）私有化爭議一役大勝一仗，之後又擺平雷曼迷債爭議，最近更將靠內幕交易圖利嘅摩根士丹利前董事總經理杜軍收監7年。睇怕未來3年啲市場壞分子要醒定啲嘞。