新澤西網隊今夏送走32歲「飛人」卡達，正式步入重建嘅階段，球隊亦正密鑼緊鼓於2012年球季搬去紐約州嘅布魯克林，之不過金融海嘯之後，有傳興建費高達1億美元嘅場館費係最大問題。據ESPN周二報道，44歲俄羅斯鋼鐵大王普羅克豪洛夫（MikhailProkhorov、圖）同網隊管理層已接近達成協議，佢將會「開水喉」注資7億美元予網隊興建新場館，作為換取市值約3億美元嘅網隊股權；如最終達成交易，身家達95億美元嘅普羅克豪洛夫將為史上首位控制NBA球隊嘅外籍老闆，之但係呢次交易要有聯盟23支球隊老闆答應先至得，唔知屆時會唔會有個「程咬金」殺出嚟，搞到交易唔成呢！