金管局總裁任志剛仲有唔夠一個禮拜就正式引退，噚日佢返母校香港大學同一眾大專及中學生，分享中國金融事業嘅發展經驗。台下300人爭住同任總對話，除咗關心港滬兩個金融中心競爭、聯繫滙率等大題目，唔少同學仔都對任總嘅大學生活、個人理財方式、退休計劃等好有興趣。除咗點樣提點繼任人陳德霖，同埋支持邊個做下任特首外，任總幾乎有問必答。
除存款同樓乜投資都冇
任總話，細個屋企好窮，喺唔夠200呎、一家五口嘅屋企入面長大，三兄姐弟瞓喺三層碌架床，一直冇「財」可「理」，讀到大學幫教授做研究，至叫做賺到啲錢，正式出嚟社會做事，先有機會儲錢，買吓股票投資，但因為工作關係，先後出任政府金融科同金管局，投資限制越嚟越大，所以除咗存款同買樓之外，乜投資都冇。
有同學關心任總退休後會唔會情傾祖國做央行行長，任總就話「機會好低」，但有機會都會樂意參與。任總下個月榮休，累積幾十年金融點滴，佢話都有諗過出書，雖然香港出書冇乜錢賺，但自己鍾意寫嘢，一星期寫一次嘅專欄《觀點》，半個鐘就起到貨，佢想趁仲有記憶，寫吓一啲未曾公開嘅歷史。任總仲話會有新嘗試，就係要學習點樣「Hea」，皆因佢話成世人完全都未「Hea」過喎！
李華華
mailto:[email protected]