隔籬埠立法會選舉塵埃落定，八方在此敬賀澳門民主派嘅吳國昌同高天賜等人成功取得四席，亦向「澳門民建聯」群力促進會慘失一席表示深切慰問。事關以街坊總會為骨幹嘅群力，一向都堅守兩個直選議席，今趟左派配票失敗，認真連累街坊。
配票失敗鬼打鬼
點解話左派配票失敗？今屆票后係工聯會嘅關翠杏，杏姐名單掃取左派票倉逾22,000票，只要杏姐「過」4,000票畀群力，群力第二候選人陳虹就可以勇挫周錦輝太太陳美儀，左派兩張名單就可以攞四席。
可惜世事冇咁完美，否則選管會亦唔使搞到將6,000幾張廢票起死回生咁樣衰。澳門通譚志強話，選舉當日杏姐同群力齊齊嗌告急，鬼打鬼結果搞出事，杏姐名單選票多到瀉，群力卻唔夠數，左派陣營痛失一席，澳門中聯辦恐怕要好好檢討交代。
譚志強分析，其實今屆選舉兩派陣營選票分佈同上屆相差無幾，民主派勝在分名單策略，吳國昌同區錦新分道揚鑣，若非中產新人林玉鳳咗5,000幾年輕人票，民主派隨時攞五席。