闊別網壇16個月嘅比利時球手軒寧，睇到同胞兼昔日勁敵26歲嘅史施達絲，做咗媽媽復出後5星期就竟然極速贏咗美網冠軍，搞到27歲嘅佢終忍唔住準備正式復出，實行同史施達絲拍住上組成「中女2人組」，食住個勢繼續掃走現今嘅網壇「o靚妹」！
原本仲勁過史施達絲
軒寧細個時母親就因癌病逝世，造就佢堅強獨立嘅性格，喺99至08年嘅職業生涯贏咗7個大滿貫，全盛時期仲力壓史施達絲做網壇「1姐」，認真巴閉！之不過佢嘅笑容唔多，表情嚴肅，唔知呢次重拾網球樂趣嘅軒寧，復出後嘅形象會唔會有轉變呢？
軒寧復出一直都有傳聞，今次嘅起因係喺史施達絲贏咗美網之後，近5個月都冇更新個人網頁嘅軒寧竟然撰文祝賀佢；之後佢做聯合國大使時叫記者「遲啲先問佢復出嘅問題」，證明態度軟化；加上佢嘅前教練洛迪古斯就話，軒寧喺呢3個月來一直都密鑼緊鼓咁，每周進行定期訓練，佢仲向贊助商攞咗14塊球拍嚟練習，可想而知佢為復出付出幾大。
年尾參賽備戰澳網
預計軒寧今次復出後，會分別參加11月同12月嘅比利時網賽同杜拜網賽，作為明年1月澳網嘅「熱身」；我求大俠都好期待睇到身高只係得5呎6吋嘅軒寧，大鬥現時一眾又靚、又高嘅「o靚妹」球手，好似美網亞軍「丹麥甜心」禾絲妮雅琪等。
軒寧喺網壇最著名嘅係佢堅毅不屈，現今網壇就係少咗呢種球手，喺美網冒起「美國新星」奧甸嘅偶像就係軒寧；如果佢真係能夠迅速回復高水平，會唔會同史施達絲喺明年嘅澳網女單決賽，上演「中女大惡鬥」！