有傳29歲嘅「細哨」朗拿甸奴選擇退休，但喺02年同佢一齊為巴西贏世盃嘅「大哨」朗拿度，今季返咗巴甲效力哥連泰斯後，擺脫多年傷患，叫做重拾全盛時期6、7成風采，我求大俠都戥佢高興。周二度過33歲「牛一」嘅佢喜事陸續嚟，皆因佢嘅女友比雅（右）已經懷孕4個月，照咗出嚟仲係囝囝，預產期為明年春天；「大哨」曾講過話自己仲有心有力踢明年世盃，唔知個囝囝好唔好腳頭，出世後就帶挈老竇獲重召？如果係就「雙喜臨門」囉！