「收豬肉喇！」六十年代郵差口中的「豬肉」，其實是港人寄給內地親友的布包裹，內裏的煉奶和「阿婆香水」，是內地同胞眼中的寶。物資匱乏的日子，他們還會將布袋用來做衣服、面巾。
58歲的葉滿光現職高級郵差，處理過不少港人自製的布袋包裹，每個不可超過兩磅，郵費$1.6，很多人會放兩罐煉奶，「有啲人博唔磅，擺多支藥油落去。」內地郵政規定，包裹只可索繩，不可封口，每人每月只可收一次，啡色布袋因貌似豬肉而得名，「（包裹）多到一日都寄唔晒，要租個倉貯存住先，尖沙嘴半島旁邊有間消防局，租埋嚟做貨倉。啲同事話嗰時人太多，做到晒掟嘢。」「豬肉」多寄往福建、廈門及潮州，當時內地來港的巿民聚居北角、上環、深水埗，附近的郵局特別忙。
縫白毛巾寫地址
葉滿光也替媽媽寄過眉豆、罐頭和藥油，「媽媽好有心機，係咁縫，縫好之後再反轉，上面再縫張白毛巾寫名寫地址，對方收到（毛巾及布）可以用得番。」
「當時香港都好困難，我記得阿媽55、56年返鄉下，就算冇錢都會擔啲飯焦、麪包皮返去，係血濃於水嗰種。」內地親人用「南風」來形容香港來訪的親友，代表有物資接濟，「阿媽揹住細佬，又過渡輪，又再轉車，一早去，夜晚先到，揹住支擔挑唔敢瞓，驚俾人偷。」
後來國家開放，他隨家人返鄉，「帶衫返去要打稅，着喺身就唔使打，所以個個着幾條褲、幾件衫，流晒大汗，過咗關喺廁所換。表弟叫我帶錄音帶畀佢，嗰時打100%稅。家就有錢喇，返去請我食飯，一餐飯幾千蚊，食野味、食鮑魚，晏晝都開白蘭地。」