商台名嘴李慧玲言詞辛辣，噚日卻俾廣管局「修理」。李慧玲早前在節目中話議員陳偉業今年5月去廣州時，問當地官員六四問題，之後講到自己好敢言，李慧玲批評陳偉業「懶叻」，做法「令人鄙視」，又叫聽眾「唔好俾呢啲人呃到」。
可能損害聲譽
事後有人向廣管局投訴李慧玲人身攻擊，廣管局審議後指批評不合適，可能損害陳偉業聲譽，裁定投訴成立，向商台發出勸諭。廣管局上月又審理幾宗投訴，有市民指多個電子傳媒報道陳偉業在立法會講「狗噏」、「狗官」、「仆街」時，都用「嘟」聲掩蓋，冇原汁原味出街，誤導觀眾以為陳偉業爆粗。
廣管局認為咁做冇引致報道不準確，又話為尊重編輯自由，裁定投訴不成立。大嚿陳偉業恥笑廣管局縮骨，迴避裁決「仆街」係咪粗口呢個關鍵問題，佢表示不認同裁決，又指已罷聽商台。
此外，近年大灑金錢賣廣告嘅板長壽司，4月至7月在亞視、無綫播出美女露乳溝遞壽司畀男童嘅廣告，有市民投訴，影視處認為廣告冇問題，市民不服再向廣管局投訴，廣管局覆檢後推翻影視處裁決，改指廣告有性暗示嘅描繪手法不恰當，意識不良，向電視台發出勸諭，以後唔好亂播。