美元終於抽番上來，加上新股凍結大量資金，大市成交跟不上升勢，反而炒友變晒快閃黨，窩輪及牛熊證成交佔大市27%，而且兩邊角力，好淡街貨勢成水火，是但一邊擦槍走火，大市再現突破的話，又會血流成河。還好，新股資金逐步回籠，到底流入現貨炒影子，還是繼續「勁抽遊戲」，要視乎下一輪新股吸引力有幾大。
本周9隻新股中，推介獲世界第三大退休基金ABP旗下APG認購的寶龍（1238），因為佢係進可攻退可守的二三線發展商，買地成本低、毛利高，負債少，肯定比短債逾60億元的恒盛（845）好。
綜合近期新股孖展反應，發現市場鍾情的都是內需行先，所以要留意今年最大集資金額的豐益國際，亦即係內地食用油大阿哥「金龍魚」阿媽。糖王郭鶴年家族的豐益，喺06年透過收購嘉里糧油，獲得呢條佔小包裝食油市場份額逾三成的金龍魚，連國企中糧控股（606）至今亦只搶到10%市佔率。
不設禁售期可即沽
不過即使係「金龍」，都唔係一躍就登龍門，今年第一季開始產品價量齊跌，但盈利能力佳，仍有超過一成增長。相反，被打到落花流水的中糧，上半年雖賺超過10億元，但若果唔係有4.5億元政府補貼，盈利倒退肯定不止38.8%。
呢條金龍魚唔單止大件，走位快，利錢高亦令佢唔過塘都咁肥。睇番內地食油市場，以大豆油及菜油最普遍，一支1.8公升的大豆油只係20元人民幣。食開有感情，5月公司將食油加價10%，不但冇趕客，其他小型油廠都紛紛跟加，成功將大豆成本上漲的風險轉嫁消費者。
不過新股基本因素點好都假，有冇得升好大程度取決於貨源誰屬，中冶（1618）未上已有神秘人幫大戶圈貨，又傳有舊股東急於求售，但睇番招股文件，公司早喺上市前完成職工股回購，上市後母公司持有的75%股權，該批股份亦有36個月禁售期，社保基金持有的A股亦係一樣，惟獨社保基金的H股部份不設禁售期，就如金隅（2009）一上就即刻狂沽，手法極之兇殘，原來社保先係幕後推低大市的「原罪犯」。
胡孟青