綠色和平推廣無車日，成功迫使特區高官噚日搭公共交通工具返工扮環保，但不出半日，官員中午去食飯時已經故態復萌坐番政府車，一場偽善環保騷爛尾收場。
煲呔：象徵性
煲呔噚日朝去完教堂，身先士卒由禮賓府行去政府總部開行會，雖然僅500米距離，但由於有成半百記者追訪，所以行得好慢。煲呔強調響應無車日係象徵性，以示政府重視環保，表明暫不考慮日日晨運去政府總部，因為要勞動好多保安。
食物及衞生局局長周一嶽坐纜車由山頂落中環，局長行兩步就身水身汗面紅喘氣；行會召集人梁振英則攝位坐van仔。環境局局長邱騰華孭個背囊好瀟灑咁搭港鐵，佢同八方講，本來想搭小巴再轉乘港鐵，但見天氣清凉，連小巴都唔搭，由屋企行廿分鐘去港鐵站，搭車時仲見到幾個同事。
住舂坎角嘅政制及內地事務局局長林D9搭小巴去銅鑼灣轉港鐵，全程約40分鐘，佢話比平時坐局長車多10分鐘左右。民政事務局局長河蟹曾喺政府總部一見到記者時指住自己對腳，意謂安步當車坐「11號」返工。教育局局長孫公選擇搭巴士，佢做官幾十年，坐慣AM車，難得有機會熬巴士，個樣竟然幾enjoy。
唐唐打回原形
政務司司長唐英年同律政司司長黃仁龍都係住香港仔壽臣山，噚日約埋一齊搭的士去中環。高官身體力行唔坐公家車表面睇好環保，但不出四個鐘頭就打回原形，中午食晏時間，唐唐就坐返CS專車離開政府總部，煲呔下午亦坐特首座駕去灣仔出席國慶活動。
香港絕大部份打工仔都係坐公交上下班，環保團體推廣無車日對佢哋嚟講似係笑料。
mailto:[email protected]