未受過迫害，沒嘗過飢餓滋味，怎能明白顛沛流離。林澤飄是七、八十年代的市政局議員，曾經是茶果嶺區票王。1960年，內地農民餓得兩手發抖，卻口口聲聲要多謝毛澤東，他受不了，偷渡來港，做過工廠，後來當上巿政局議員，可惜晚年太太患上思覺失調，情緒受昔日政治鬥爭的片段困擾，同行大半生，患難夫妻終須分。
飄叔今年73歲，祖籍惠東。父親從商，在他6歲時去世。因為背景不好，他三度考進大學都不獲入學。哥哥分配到煤礦工作，成績優秀的他在文化館做研究，又到過學校教書。
包白牌出九龍 巧遇表哥
家家煉鋼的日子，他在鋼鐵廠做保健，背着藥廠替受傷工人敷藥，田裏的穀熟了也沒有人收割，59年終爆出糧荒，「加埋人民公社、大鑊飯，之前仲要畀錢蘇聯，抗美援朝，當時廣東餓死好多人。啲阿伯攞住啲穀，手震震，仲喺度講『多謝毛主席、多謝毛主席』，真係好凄凉。一個月先得十一、二斤穀，幾粒米加水煮，粥唔似粥，飯唔似飯，窮到不堪設想。」
飄叔這種背景，在那個環境，捱餓本是必然，「多謝我個同學，佢成份好，做糧所所長，成日夜晚叫我去佢度，好似做賊咁，畀啲米我，畀啲油我。」那年他回鄉教書，伺機偷渡來港，「扒木船仔俾人捉到，人拉咗去惠州教導所。」
翌年再次出擊，「夜晚8點幾落船，天光西貢上岸。成條船24個人，我最巴閉，有40蚊人民幣，去金舖兌咗10幾蚊港紙，包架白牌車去九龍城衙前圍道，撞到表哥出街買嘢。好彩，唔係嗰時冇電話都幾難搵。」他說從惠州來算容易，不像海豐、潮州水路遠，且多是農民，「唔似我哋係漁民，好多都浸死。」
安頓後他找到工作，在牛頭角現時淘大附近開山，「抬啲大石上車，搵5蚊一日。」又先後做過塑膠、製衣、鍍銅，還當上修衣車師傅。生活改善，飄叔不忘託漁民帶麪粉和食油給鄉間的家人。
日日沒停手的日子，飄叔遇上一位同鄉，「佢係地主婆嘅女，1962年爬山嚟，嫁咗畀個香港男人，成日打佢，佢次次俾人打完就搵我，我咪租間屋畀佢喺石圍角住囉。」同鄉最後成為了飄嫂，育有四名兒女。
前妻難忘迫害 思覺失調
好景短暫，飄嫂患上思覺失調，「佢阿媽係地主婆，生得好靚，嗰陣俾啲貧農民兵強姦，我老婆細個睇住件事發生。」被迫害的記憶埋藏心底，飄嫂病情一發不可收拾，「佢係好人一個，到最後好嚴重，試過佢鬧我，我唔理佢，入廁所食煙，佢走去煲滾水淋落嚟。」飄嫂堅持離婚，患難夫妻無法同偕白首。
如今飄叔已再娶，住公屋單位，靠綜援生活，回望大半生，「如果當年局勢不混亂，我諗我喺鄉下都算好，我又識字，都可以維到生。」