有63年歷史嘅老牌政經雜誌《遠東經濟評論》（FarEasternEconomicReview）噚日宣佈今年12月出版最後一期後停刊。擁有《遠評》嘅道瓊斯集團發言人話，停刊係「當前嚴酷商業環境下」的「艱難選擇」，現時雜誌僅有5名本港員工，會盡量安排內部轉職，希望唔使裁員。
每期銷量曾經逾10萬本嘅《遠評》，04年底因財政問題縮皮，由周刊變成月刊，當時喺香港裁員80人，可惜經營一路冇起色，舊年再受金融海嘯打擊，終於走進歷史。《遠評》內容主要分析亞洲政、商界局勢，曾經係本港及亞洲地區數一數二權威英文刊物，唔少名人曾做過《遠評》記者，包括終院首席法官李國能、資深大狀清洪、民主黨卿姐等。