【本報訊】四名孕婦早前分別入住兩大著名「生仔」醫院分娩，結果嬰兒一個斷手骨、兩個斷腳骨、一個斷鎖骨，小人兒未足月就要打石膏，狀甚凄凉；四個家庭懷疑醫院失誤，其中一名事主本身是助產士，對於浸會醫院不解釋、不負責的態度非常不滿，其家人昨日傍晚報警求助。記者：張嘉雯、鄧秋英
梁太今年38歲，在內地任職助產士，今次懷第二胎，周一到浸會醫院作產前檢查，發現胎位不正，醫院即時安排她剖腹產子。約四個小時後，醫生向其夫表示嬰兒右腳骨折及移位，但並非先天。梁太在港的親人鄭小姐直指醫院疏忽，「我哋今日嘈咗好耐，醫院都冇人答我哋，到下晝5點幾先見番個婦科醫生，佢淨係話斷腳係手術併發症，問佢點解會咁，佢答我話唔知。」
「都畀唔到合理解釋」
院方向家屬表示會為嬰兒做腳托矯正，但不會負責嬰兒的醫療費用，「我哋都唔知佢係咪畀人虐待，醫院係咁迴避、態度漠視、唔負責任，到家都畀唔到個合理解釋我哋，完全唔可以接受。」鄭小姐昨已報警求助。浸會醫院表示，由於梁太的個案已交由警方處理，暫時不會回應。
此外，來自內地的何太，月初以半身麻醉方式，在浸會醫院剖腹誕下幼子，結果兒子斷手，「產後幾小時，醫生說BB右手肱骨骨折，是受外力所傷，要打石膏。院方曾派人叫我們不用擔心BB的醫療費，怎料最後他們反口，我們要自己支付BB多住八天的2萬元醫療費。」院方至今沒有交代嬰兒受傷的原因，浸會醫院至截稿前未回應此個案。
「啪一聲右腿骨斷咗」
公立醫院亦有苦主。懷有雙胞男嬰的陳太7月在廣華醫院開刀分娩，「大孖先出，突聽到『啪』一聲，原來右大腿骨斷咗，有個兒科醫生即刻話可能係玻璃骨，聽完我好擔心！」最後證實大孖並非玻璃骨，陳太丈夫直斥醫生「隨口噏」推卸責任，他又質疑院方沒有兒科及骨科醫生跟進大孖，「廣華先搵三塊尿片墊住隻腳，投訴完再搵布架套住隻腳，好唔專業。」陳家將大孖轉往私家醫院專科求診。廣華醫院回覆指，院方已向家人解釋情況，亦有顧問醫生跟進治療男嬰。
同在廣華生產的王太，與丈夫為內地人，8月以自然分娩方式誕下幼女，兩天後醫生才透露幼女的右鎖骨骨折，「醫生解釋係產道壓迫造成，我唔相信，點解BB出生後唔即刻講？」廣華醫院回應指，助產士兩日後為女嬰洗澡，才發現其右鎖骨骨折。根據醫療文獻記載，嬰兒在分娩過程出現鎖骨骨折情況約1%，醫生已轉介其女兒接受物理治療及到兒科門診覆診。
專家之言：嬰兒骨骼易折亦易癒合
婦產科醫生解釋，出生後骨折的情況在足月嬰兒身上並不常見，但若胎兒天生骨骼有問題、胎位不正或早產，醫護人員為了保全嬰孩生命，盡快完成分娩，可能會拉傷嬰孩手腳。有兒科醫生及骨科醫生呼籲家長毋須過份擔心，因為嬰兒骨骼雖容易折斷，也容易癒合。
早產或胎位不正也易斷
婦產科專科醫生靳嘉仁指，足月嬰兒不常出現骨折，若嬰兒有先天骨骼或關節問題，例如「玻璃骨」，出現骨折的風險較高，其次是胎兒胎位不正，「好似打橫瞓、patpat向下，都可能拉傷手拉傷腳。」此外嬰兒早產，手腳關節脆弱易斷，也容易受創傷，「仲有一種情況就係開刀救命，例如BB心跳唔好，用鉗都出唔到；BB即刻要出世，要緊急開刀，就可能會拉斷。」
兒科專科醫生馮宜亮指，嬰兒的骨骼天生脆弱及幼細，容易折斷也容易癒合，「父母唔使咁擔心，BB骨易康復，長大後可正常做運動，問題不大。」骨科專科醫生高永文指，嬰兒骨骼柔軟，「只要位置唔好移咁犀利，可以好快生番，一般唔係咁難癒合。」本報記者