世界衞生組織西太平洋區域委員會會議噚日喺香港開幕，久違嘅陳馮富珍以世衞總幹事身份返嚟香港開會。雞珍話，好開心返香港，因為一直都好掛住香港，啲長輩仲話佢已經係外嫁女，嫁咗畀世衞嘅成員國，要專心照顧外頭嘅「老公」，唔得閒理佢哋喇。
雞珍咁感性，周一鑊都唔蝕章，即刻擦晒鞋咁話，今次西太平洋會議喺香港開，正好畀個藉口陳太返香港見大家。新加坡代表就讚陳馮，對付豬流感疫情夠果斷，係個「好新抱」。心情大靚嘅雞珍就讚中國處理疫情做得好好，通報得快，透明度高，仲強調自己呢啲唔係外交詞令，係有嗰句講嗰句。
八方聽見佢哋讚來讚去，仲以為自己去咗個表揚大會。