中共建政60周年，唔只親北京團體大搞，連白鴿黨都搞埋一份，但搞嘅方向當然唔同。
白鴿黨主席仁哥噚日話，愛國唔應該只講感性認同，全方位認識中國歷史都好重要，所以嚟緊佢哋會搞個「建國60周年研討會」，搵嚟前學運領袖王丹、民運人士魏京生，同市民進行視像會議，回顧同前瞻中國政治改革外，仲會請程翔同一班台灣、歐盟專家，多角度討論兩岸關係，臨尾仲會由馬丁、華叔、飛哥同毓民，特別對談「甚麼是反中亂港？」相信到時一定好精采。
主題曲回顧大事件
為隆重其事，民主黨今次仲同香港投訴合唱團合作，整咗首叫《中國自由夢》嘅歌，做研討會主題曲。雖然首歌只有約五分鐘，但已包含唔少重要中國歷史事件，包括文革、六四，呢啲親北京團體唔提嘅嘢，片中都會如實反映，片尾仲有王丹作特別呼籲，指中國近年經濟有所發展，但最希望仍係中國可以有自由同法制，因為咁樣先可以有真正社會和諧，想睇可以去 http://www.youtube.com/watch?v=CJa6CkBmf4w。