大劉劉鑾雄女友陳凱韻（甘比）舊年10月誕下囡囡劉秀樺（Josephine），霎眼間B女都就快1歲大。甘比自從生女後，得寵指數日益上升，經常陪住大劉食勻全港富豪餐，上星期四晚佢哋又出動撐枱腳，齊齊去上環嘅尚興潮洲海鮮飯店開餐。
名牌袋次次新款
喺九年之間，由平凡小記者變成家坐擁億元身家嘅甘比，今時唔同往日，住豪宅坐靚車，打扮又貴氣，出門必備嘅Hermès手袋幾乎次次新款。嗰晚佢同大劉嘆潮菜，比前略為清減嘅甘比黑衣一度，手挽一個價值12萬、全球限量30個嘅HermèsKellyBag，甚有年輕富太feel。
飯後約9點鐘兩人離開，一馬當先步出食肆嘅大劉，以獨特嘅澗水步法，低頭拉起褲腳而行，甘比就乖乖尾隨在後。
平日佢哋拍拖出街，通常都有保鑣護航，各自坐車嚟又各自坐車走，不過呢晚佢哋零舍糖黐豆，唔單止冇保鑣隨行，仲雙雙登上大劉「48」車牌嘅Benz，由司機接送離開。睇嚟大劉對甘比嘅寵愛又升呢。