澳門立法會選舉結束，賭王四太梁安琪（Angela）參選嘅澳門發展新連盟，得到超過萬四張票，16個組合中排名第四，證明四太真係同第四有緣。選舉委員會通宵點票，去到三更半夜，四太突然着住件黃金戰裙蒲頭，仲忍着淚當眾多謝燊哥關照。
澳門選管會開票好慢，9點截止投票，到凌晨2點仍未確實投票結果，只係不斷公佈部份投票站嘅不同組合得票率。競選連任嘅四太乃係大熱人馬，大早已經喺葡京日麗餐廳舉行祝捷會。但係一日未確定勝算，四太一日都唔肯出來見記者。大批澳博員工同傳媒喺餐廳食住等，四太就匿喺VIP房休息。
直至凌晨3點，票數十拿九穩，四太終於蒲頭。Angela日頭去投票同巡視票站時，仲着住條青春可人嘅短褲仔。宣佈當選一刻，就換咗條黃金色的褶裙，成個公主咁，以勝利嘅姿勢走到餐廳接受員工掌聲，同競選拍檔擁抱。呢個時候，有職員仲忍唔住流下眼淚。
四太走上台致謝，先向在場同事同鄉親一一道謝，跟住就開始來料。佢話要特別感謝抱恙嘅賭王畀佢支持，因為何鴻燊博士一直對佢非常支持。Angela話，好多謝何生一直對佢嘅教導同支持，希望佢可以早日康復，帶領佢再闖高峯。
有六千員工做「反骨仔」
講到呢度，四太眼泛淚光，聲音一度哽咽。旁邊有個老叔父準備好紙巾，但係女強人最後都忍得住冇淚灑人前。不過現場嘅員工就比老闆娘眼淺，一連串答謝之後，雖然八方覺得好行貨，但係部份員工就感動到淚流滿面，搞到好似四太落選咁款。
跟手四太倒咗杯香檳走落台下，穿梭喺荷官同親友之中，碰杯慶祝。整個日麗廳塞滿幾百名澳博員工，不過Angela話，今次動員嘅票倉不獨是澳博員工，仲有來自永利嘅大佬同荷官，同埋賭王公子何猷龍嗰間新濠國際嘅員工。
若然係咁嘅話，澳博同新濠國際都有唔少食碗面反碗底嘅「反骨仔」。點解咁講？淨係澳博都有二萬員工，新濠又有3,600，唔計永利嗰7,000，身為澳博董事嘅四太應該穩奪二萬幾票先係，點知佢個組合只係攞到萬四張票。學賭王話齋，唔投票畀老闆娘嘅員工，錯得好緊要，佢哋自己心裏有數，佢哋會唔安樂。
mailto:[email protected]