結構信貸產品專家兼前雷曼高層黃元山，喺雷曼迷債風波中，為唔少苦主同投資者講解何謂CDO（債務抵押債券）、CDS（信貸違約掉期）及Accumulator（累計認購期權）等複雜嘅金融工具點樣運作，同埋玩呢啲遊戲輸錢嘅死因。
已退出投資銀行行列嘅Stephen（黃之洋名），除咗喺中文大學兼任講師外，近期又多一瓣搞作，就係推動環保。Stephen參加咗新成立嘅非牟利環保組織「健康空氣行動」（CAN），希望為香港重現藍色天空出一分力。
呢個綠色組織，最近同本地流動通訊網絡商香港移動通訊（CSL）合作，由今日起，CSL會透過發短訊畀客戶，內容名為「一個名字，一口健康空氣，支持CAN，爭取自由呼吸」云云，希望藉短訊鼓勵佢哋簽署健康空氣行動請願書，活動歷時兩星期，時間上啱啱配合政府將會就空氣指標檢討進行嘅公開諮詢。