親中社團重視十‧一自然不在話下，今年仲適逢60周年，點會唔大搞？逾廿個親中團體決定9月27日搞個「鑽禧繽紛賀國慶」巡遊嘉年華，查實即係好似7.1回歸大巡遊咁，搵不同表演團體上街載歌載舞贈吓興。
但呢次巡遊始終有啲唔同，除咗改由維園出發，終點繼續係灣仔修頓球場外，時間亦由朝早改為下晝4點。同時，以往係由唔同團體夾錢搞，但呢次活動就由香港廣東社團總會獨家贊助。
據聞贊助費高達300萬至400萬，除咗李超人、陳瑞球同林建岳等慷慨解囊之外，身任主席嘅九龍城區議會主席王國強仲肯包底，總會中人笑笑口話大家咁踴躍，多得活動召集人鄭耀棠夠飛屎喎。