各大行搞論壇，總會叫齊記者爭取曝光，順便賣賣免費廣告。里昂昨日開始一連幾日的座談會，引來全球唔少基金經理到訪，畀面派對包括大孖沙講者滙豐大班霍嘉治、東亞（023）大小寶貝、中國海外（688）等高層。
既然咁大面請到群星拱照，傳媒亦樂意大事報道，可惜小記告知，大會對待記者有三不准︰不准入場聽、不准入場拍、不准在會場內等嘉賓。玩獨家，搞分析員會議唔預記者採訪都可以理解，但連講座的日程都當係寶，嚴禁記者索取，有邊個嘉賓、幾時到會場等訊息彷如國家機密，更索性將會議廳方圓10米搵「食蕉」重重包圍，剛啱連廁所都封埋，要方便得繞道上二樓。又唔喺大堂預個位畀傳媒，一眾傳媒惟有高溫下苦候於酒店門外焗一整天桑拿。又要請記者採訪，又諸多限制，真難理解，莫非會場內有驚世大貼士益自己客？總之，大行要成功，除咗要有好嘅分析員報告之外，公司形象亦不容忽視，冇傳媒焦點，捧唔起明星分析員，再好嘅報告都盞嘥，最後股價炒唔起，大客仔只會以腳投票。
大注孖展博唔過
有感而發係因為里昂報告其實唔差，唔應該咁浪費。睇番最近分析濠賭股，顯然都收到風內地放寬居民到澳門的限制，唔怪得8月開始賭股一飛冲天，連銀河娛樂（027）都話，旗下星際酒店上月有九成入住率，黃金周更係爆晒棚。
自5月開始，里昂大力推介賭股，叫買新濠國際（200）同信德集團（242），近期更力捧正進行推介的永利澳門（1128），原因係無論於美國拉斯維加斯，定係同澳門地頭蟲比，賺錢能力都係最高，上半年永利澳門業務EBITDA超過8億美元，冠絕同行，08年純利20.4億元，澳博只賺唔夠8億元，雖然市佔率只有17%，今年頭半年永利已賺咗澳博上年全年條數。
雖然基本因素好，但細心睇PE定得好高，原來分包銷商名單中，幾乎所有投行都係座上客，根本冇留水位，縱使額頭寫住發財埋便，小注怡情還可以，大注孖展就博唔過，隨時有殺冇賠。
胡孟青