香港金融體系發展成熟，捱過十年前嘅亞洲金融風暴，即使今次金融海嘯帶嚟無數冲擊，仍能站穩陣腳，不過，金融中心地位隨時受到挑戰，如果再唔努力做多一啲，日後好難同姊妹上海爭一日之長短。
身為智庫團體之一嘅工商專業聯會就唔係咁諗，身兼金融小組服務召集人嘅港大經濟金融學院名譽高級研究員郭國全話，相信祖國規模咁大，點止容得下一個金融中心，深信香港、上海、加北京三地可以並立，有利日後金融發展。
不過佢承認，香港不進則退，要多多同祖國溝通，仲建議港府任命一名大使，負責向內地同海外推介香港金融服務。咁究竟邊個可以勝任呢？郭國全話，呢位大使肩負重任，必須係領袖級人物、在金融界有地位、仲要具有全球知名度。華華諗睇怕月底退休嘅金管局總裁任志剛最勝任，不過郭國全話未有心水人選。咁即係空有理想，冇具體目標（人選）啦！