美國喜劇明星占基利早前就有套《乜都得先生》（YESMAN），講佢參加咗個自我改造課程後，凡遇上咩事都要說「得」（Sayyes）；基斯坦奴朗拿度（C朗）今季轉投皇家馬德里後，就成為球隊同投注者嘅乜都得先生。
又入兩球炒薩雷斯
周日場西甲皇馬主場對薩雷斯，馬會已經開到皇馬[-2]同入球中位數去到3.5球；C朗未夠1分鐘已經先開紀錄，投注「主勝」同「大」嘅球迷以為好老定，點知磨到下半場中段，皇馬都未有拉開比分，上盤凍過水之際，呢個皇馬YESMAN就出嚟打救世人，75分鐘頭槌建功助皇馬頂成2:0；之後薩雷斯散晒，再被古迪、賓施馬同雲尼斯達萊各建一功，吞夠5蛋。
長追皇馬盤嘅球迷已經連贏3口，追入球「大」更加4場全贏，唔知馬會會唔會俾C朗嚇到怕，喺月尾皇馬主場對特內里費開到[-3]、[-4]，或者入球中立數去到4.5、5.5球？
兩年內搞掂皇馬欠債
計埋歐聯，C朗4場波已經入咗6球，絕對有機會打破自己07/08球季喺曼聯各項比賽中，全季上陣入42球嘅輝煌戰績；如果C朗有咁嘅能耐，皇馬會長佩雷斯當然心都甜埋，事關嗰季C朗幫曼聯贏咗英超同歐聯雙料冠軍；而且講埋財政，C朗亦絕對幫到手，皇馬剛剛舉行完會員大會，佩雷斯公佈咗球隊有3.27億歐元（約37億港元）負債，本來聽到人都心寒。
不過自從C朗、卡卡呢啲金蛋加盟後，就算今季全季預算開支有4.22億歐元（約48億港元），但球隊嘅收益相當豐厚，所以可望減債至2.1億歐元（約24億港元），即係話只要C朗「Yes」多兩年，就差唔多幫皇馬填晒筆數，難怪巴拿比奴人人都當呢個YESMAN神咁拜。不過同樣喺曼聯過檔，雲佬就冇咁好命，射入埋齋入球後，又整傷左小腿，要休息至少6星期。