老牌球會東方噚日回歸丙組第一擊對龍門，雖則只係丙組波，但有「左倫右李」歐偉倫同李健和兩位前「足球先生」再度合作，加埋有「皮蛋黃」之稱嘅著名足球評述員黃興桂，返母會做掛名總教練；我求大俠現場所見，酷熱下仍有過百名球迷嚟荃灣海濱公園球場睇波，亞記同收費台亦有派員到場，惟獨俾人話越嚟越「是是但但」嘅大台，唔見有人到場採訪。
「東方躉」專程捧丙組波
平時丙組波，最多只得球員家屬捧場，但噚日就有唔少睇開甲組波嘅球迷，選擇去荃灣捧「左倫右李」場，而唔去深水埗睇甲組四海對普高，搞到海濱公園非常熱鬧；除咗十幾個東方死硬粉絲，仲有班追隨咗阿倫好耐嘅女球迷，連住喺海濱花園嘅南華守衞潘耀焯亦有捧場，順便同舊隊友敍一敍。
上屆丙組排第7嘅龍門，對住有和哥、阿倫同司徒文俊等前港腳壓陣嘅東方，開波初段有氣有力踢得非常緊迫，東方機會唔多；之後憑周振宇同阿倫把握到對手犯錯，上半場領先兩球，下半場東方入多兩球，輕勝4:0。
38歲嘅歐偉倫因久疏戰陣，和哥同「皮蛋黃」見佢咁辛苦，半場已經換走佢；阿倫賽後話好耐冇喺咁熱環境正式比賽，捱到半場算係咁，下周日喺顯田對瑞聯，阿倫多數會先做後備，下半場先落場。阿倫補充，好多球迷專登嚟睇波，令佢記番唔少以前踢職業嘅感覺。
和哥嚴重缺水「吊鹽水」
至於41歲嘅和哥喺球迷打氣下踢足90分鐘，右路仲段段去盡，睇到球迷拍爛手掌；但佢賽後因身體嚴重缺水，要送去仁濟醫院「吊鹽水」，要留院觀察。
完場後，「皮蛋黃」大讚和哥就算41歲仍然又踢得、又教得，而且鬥志都得，認真冇得頂，值得年輕球員借鏡；「皮蛋黃」話下場未必可以親自領軍，但只要時間許可，就會幫東方做青訓，希望培訓13同15歲以下青年軍。