郭晉安同郭羨妮主演嘅無綫劇集《古靈精探B》前晚一連播映兩小時大結局，雖然同舊年《古靈精探》一樣都係大團圓結局，但今次結局就俾網民狂鬧抄足《恐懼鬥室》（Saw）系列電影，毫無創意，馮仁昭都覺得《古》劇抄得嚟眼高手低，搞到唔湯唔水唔合情理，睇到馮仁昭好鬼火滾。
玩死亡遊戲
前晚結局講甄向華（李天翔飾）為咗幫孖生哥哥報仇而展開殺人大計，佢捉咗害死佢哥哥嘅刑晶晶（郭羨妮飾演），以及大口英（王青飾）同被于子朗（郭晉安飾）上咗身嘅張正義（郭政鴻飾），將佢哋困喺密室度慢慢折磨，要佢哋為咗保住自己條命而自相殘殺，又透過電視機向當事人畀提示，橋段勁似《恐懼鬥室》。尤其係講到晶晶如果想保住自己條命，就要劏開大口英個肚攞條鎖匙出嚟閂咗個放毒氣機關呢段情節，就同第一集《恐懼鬥室》入面，個女仔要劏人哋個肚攞鎖匙拆開自己身上炸彈嘅情節似到十足十。
其實甄向華已經先後殺死自己老竇以及同父異母嘅大哥，輪到佢真正報仇對象晶晶就竟然咁留手，而且搞完一輪大龍鳳後，無端端放晶晶一條生路，然後話口未完又要殺晶晶個BB，真係睇到人爆頭！
