有否領教過農夫的Beat殺技？唔明我講咩，係咪講緊耕田？非也！係C君加上陸永出了隻OnlineGame，在GoYeah.com上免費任你玩。遊戲內容，當然同音樂有關，但唔使你識樂理，只要夠天馬行空就得喇！
記者：陸俊雄、陳國輝
攝影：林栢鈞
農夫真人模擬發聲
頭炮Beatboxing
GoYeah.com啱啱先開台，暫時未有認識都唔緊要，由今日起，知道佢會陸續搵來歌手、藝人大搞OnlineGame就得喇！先響頭炮係農夫，遊戲主要係玩Beatboxing，玩家要自創一段具節奏的音樂出嚟。當然唔係叫你扮黑鬼，又或者拍條自彈自唱短片出嚟，因為農夫已經幫你做好晒。遊戲內收錄了45條陸永和C君真人模擬樂器的片段，內容當然是鬼鬼馬馬，你只要將片段自由組合，咁就可以砌出一條屬於自己的音樂。而你段音樂，農夫係會睇嘅，佢哋仲話：「個評分準則，主要係考慮音樂嘅完整性，同埋拍子之間嘅連貫性。」出色嘅作品，就有機會用嚟做網站的主題音樂，農夫仲唔知真定假咁話：「有可能加埋入我哋嘅歌裏面做創作元素㖭！」
Baby第二炮
講明是紅人陸續有來，到了月底大概係30號，就會有另一個免費OnlineGame推出，係同o靚模始祖Angelababy換靚衫。玩家只要用Mouse點佢入更衣室，想佢換乜就換乜，你都可以做Stylist。至於再之後到邊個藝人就未公佈住，但係GoYeah.com就簽咗18個紅人，包括鄭秀文、舒淇、任賢齊、吳彥祖、楊千嬅、何韻詩等等，排隊等住出，想睇自己偶像就要多加上網留意。
免費電影任睇
除了有明星OnlineGame玩之外，有免費電影睇亦都係GoYeah.com一大賣點。佢哋個節目存庫有300小時咁多，每兩個星期就會換牌更新一次。第一個星期就有《無間道》系列、《旺角卡門》、《頭文字D》、《阿飛正傳》、《放逐》、《依莎貝拉》等等，接住動畫、電視劇、外國電影、紀錄片等都有得你睇，而所有視訊格式都係MP4（720×480），現在免費有得睇，好過非法下載啲起晒格嘅影片苦了自己喇！