內地人來港買豪宅，不問價錢，豪氣驚人，前一排左丁山在本欄講及股票M曾經想在河內道買新樓（八月廿七日）一個八百呎單位要千六萬，佢覺得太貴，計唔掂數，打咗退堂鼓，點知之後有一個五十六樓特色八百呎單位以二千四百幾萬成交，震動全城。左丁山問股票M：「有冇呻笨呀？早知入貨，家咪等升值囉！」股票M話：「大陸表哥要威，我地港燦最緊要唔好怨天怨地，自己唔夠膽，唔會話人膽生毛，可以放長線嚟睇。」
威慣嘅股票M呢鋪自願「甘拜下風」，可見內地豪客有何等威勢。呢日賓架A話有上市公司主席自北京來港一行，想同本地傳媒人一敍，但佢只識得一個傳媒人，就係左丁山，於是充當南郭先生，與內地企業大股東一齊在某會所吃午飯。
主席K遲咗少少先至到，一入房間，左丁山暗叫一聲：「乜咁老實樸素嘅？」身穿藍斜褲，素色恤衫，一件深藍色棉布上衣，成個八十年代中國幹部嘅打扮，完全唔係內房股主席在五星酒店請食鵝肝飲紅酒嗰種大老闆款。呢位主席K自名牌大學畢業，講及科技趨勢，左丁山係科學盲，當然唔係嗰皮，講吓中國經濟發展方面，吹吓水，就有得搭嘴嘅，講講吓講到中華人民共和國建國六十年，左丁山立即小心翼翼，唔知人地點諗也，只講一句：「鄧小平堅持改革開放，最偉大。」哈，竟然一擊即中，主席K話：「輝煌三十年是有的，前三十年政策錯誤，死人無數，知識分子便死了五十多萬，六十年代初大饑荒，江蘇發生人吃人慘事，一位朋友把自己的衣服吃下肚，餓死的總有三千多萬人。現在我們人口多了，耕地少了，糧食卻多得吃不完，當年人口少，耕地多，人民要吃樹皮、吃人。這是毛澤東與鄧小平的分別。說輝煌，只有最近這三十年可以說得出口。」咦，呢位主席係思想型噃，唔講香港豪宅價錢便宜，猛講宏觀政策，一副愛國憂民樣子，少見也。隔幾日，《明報》有篇特稿──「60年點線面」標題係：「當年人吃人，今日人欺人」講「信陽農民捱過饑荒再抗人禍」（信陽位於河南省，有魚米之鄉之稱），讀之令人感嘆，主席K捱過當年苦日子，捱餓之時點會夢想到有一日成為一間中國上市企業主席吖，正是留得青山在，哪怕沒柴燒，最緊要係乘勢而起。