領匯上市後，居民同商戶不斷指摘加租害人，八方在最新一期政府《憲報》發現，幾年前十分活躍嘅「全港公屋商戶大聯盟」被警務處社團事務主任通知要「除名」，如果三個月內唔向相關部門遞交資料，「大聯盟」就會「人間蒸發」。
據《社團條例》，註冊社團需定期向警務處交資料，年中有好多團體被通知或會被除名，當中有啲可能真係玩完，亦有啲可能係負責人唔記得辦手續。「大聯盟」近兩年不活躍，八方聯絡唔到曾任主席嘅林偉賢，未知是否真係摺埋，曾與「大聯盟」同一陣線反對領匯人士稱，小商戶已被領匯迫到執晒笠，如果「大聯盟」真係壽終正寢亦不意外，亦有人指部份商戶與領匯合作愉快，「大聯盟」早就名存實亡。