聲效差!　觀眾笑聲反具臨場感

唔通係麥提爽嘅商界絕招──長尾理論！佢呢期再憑《絕代商驕》紅爆視界網界，連平日唔睇電視劇嘅網友，半夜都堅持上YouTube翻追早前劇情；套劇已經大結局，但碟界早幾日又推出佢嘅「延續篇」《越大鑊越快樂》，入面冇Bonus、冇字幕，純粹食人氣出碟，DVD舖老闆勁讚銷情好好，證明麥提爽你呢招又掂咗！

記者：陳國輝

黑位多Noise兼爆格

呢一集只係推出DVD版，並冇到Blu-ray。梗係啦！畫面大部份時間除咗影住黃子華同身後一班觀眾，基本上冇靚畫面可言！
老實講，Noise真係幾離譜，甚至間歇會見到黃子華頭髮上會出現輕微爆格，但好好彩，佢呢套只係個人棟篤笑，所謂舞台設計，只係一隻巨型「鍋底」，不設華麗佈景、沒有煙火效果，更別妄想會好似林海峰咁，每集搵嚟嘉賓紅人做客串；純粹睇個人表演，除非你覺得佢好靚仔，否則對畫質自然冇咁高要求。本來對聲效冇乜要求，但今次有啲特別，事關棟篤笑內容加插好多唱歌表演環節。扮完歌神許冠傑，又扮徐小鳳唱腔，跟住，佢又再變番做哥哥，喪唱巨星首本名曲，唔識黃子華，或許以為佢一直開緊演唱會！但聲效真係弱得緊要，人聲唔夠清晰，要低音冇低音，簡直同一般ConcertDVD差十萬九千里！唯一可讚係採用DolbyDigital5.1，「後面」嘅笑聲聽得好清楚，臨場效果幾逼真。

零Bonus誠意不足

如果你有份買飛入場，一定好想知DVD同現場版本有乜唔同？Sorry！除咗變成由屋企部電視作輸出，基本上冇分別！入到Menu，筆者本想睇吓有乜花絮特輯、訪問內容等，可以打定個底……
點知，佢只有「全部播放」以及「分段播放」兩項選擇，而且BG製作只用DVD封面做Wallpaper，感覺上唔夠誠意；更慘嘅係，由於現場錄音時大、時細，DVD內連字幕都冇提供，聽唔清楚嗰部份咁就飛過咗，你話幾唔方便。