鄉議局噚日舉行慶祝10.1酒會，主席發叔係行會成員，煲呔畀面到場，八方見到兩人雞啄唔斷密斟，之後問發叔有乜咁好傾，係咪討論垃圾焚化爐可能落戶屯門問題，發叔哈哈笑幾聲，話呢啲大問題邊有可能三言兩語成事，何況政府都只係話仍在考慮中，未必揀正屯門，家陣就傾，言之過早，等埋環評報告結果都未遲。
同煲呔慢慢講數
不過發叔又話，如果政府真係喺新界西北區興建焚化爐，應該畀番啲好處區內居民，因為冇理由要居民無條件接受厭惡性設施，如果要屯門居民「捱義氣」啃晒700萬人垃圾，就要居民克服心理障礙，點樣克服呢？最直接就係畀啲回報居民，發叔無多談如何「回報」，可能想閂埋門同煲呔慢慢講數。
港府興建焚化爐事在必行，環境局局長邱騰華去完日本考察當地新型焚化垃圾設施，大讚又靚又正，去到都唔知原來係垃圾焚化爐，值得香港借鏡。佢又有意為焚化爐「正名」，強調高科技「廢物處理綜合中心」環境優美，一條龍將垃圾焚化、清潔及消毒，乾手淨腳。