現實中的確有唔少車廠為荷李活電影設計未來汽車，上次講過有靚佬湯×凌志嘅《未來報告》，但論天馬行空，點都要提Audi電影處男作《智能叛變》（i,Robot）。廠方首次為科幻電影打造汽車模型RSQ外，戲內韋史密夫被兩架「未來大巴」前後包抄，幾十隻Robot着晒燈咁襲擊佢，喺隧道內RSQ可以打橫、打斜，甚至360度「發」住咁行，相當之神奇。幾年前睇以為係類以磁浮之類嘅科技，睇番資料，先知原來四個轆用上18吋旋轉球嚟行，即係舊時滑鼠嘅TrackBall原理，而且RSQ唔係Audi天馬行空齋吹之作，有晒代號Nuvolari嘅研究書，即係有可行性，雖然現今科技仍然未做到滾球行車，但如戲內設定成真嘅話，2035年以後泊超窄S位都無有怕喇。
記者：徐影龍