上海國際田徑黃金大獎賽今屆已是第5屆，雖然「百米飛人」牙買加的保特因疲倦而退出，但有中國13億人民希望的劉翔養傷超過一年後首次復出比賽，故依然苗頭十足，以下就是今屆大獎賽的賽程及其他看點。
7:40pm女子撐竿跳
全日比賽最有可能產生世界紀錄的項目，因為有「女鳥人」兼世界紀錄保持者伊仙芭耶娃（圖）參賽；另觀眾亦想看看這名俄羅斯選手會否像早前的世錦賽般爆冷落敗。
8:35pm男子400米
美國黑人跑手米列特（圖）自京奧成功壓過隊友禾尼拿後，就一直稱霸男子400米，且看他今次能否再勝一仗。
9:15pm女子100米
相信是美國與牙買加選手之戰，牙買加跑手在世錦賽女子短途項目令美國選手面目無光，且看甘普爾及莎朗森遜（圖）能否延續這佳績。
9:35pm男子100米
雖然世界紀錄保持者保特沒有參賽，但前世績保持者牙買加的鮑維（圖），以及史上第2快的美國跑手基爾都會參賽。
上海國際田徑黃金大獎賽秩序
7:40pm 女子撐竿跳
7:45pm 男子跳高
8:00pm 女子三級跳
8:05pm 女子400米欄
8:15pm 男子1,500米
8:25pm 女子200米
8:32pm 男子跳遠
8:35pm 男子400米
8:45pm 男子200米
8:55pm 女子100米欄
9:05pm 女子400米
9:15pm 女子100米
9:25pm 男子800米
9:35pm 男子100米
9:45pm 女子1,500米
9:55pm 男子110米欄
《花絮》
《美女廚房》「加料」
劉翔會喺今晚9點55分出場，咁啱三色台呢段時間做緊《美女廚房》，但話晒「劉欄王」係國寶級運動員，又係久休復出，所以三色台亦要畀面，突決定會喺《美女廚房》內插播，等免費電視觀眾可以見證到呢個歷史性時刻。
劉欄王着加碼鞋出戰
劉翔嘅傷雖然好番晒，但所謂「小心駛得萬年船」，所以佢會喺自己嘅跑鞋入面墊上一塊海綿軟墊，等佢喺發力嘅時候唔使就住就住。亦因為咁嘅緣故，佢嘅跑鞋亦大咗半個碼，由42號半變咗做43號。
伊仙芭耶娃變「大茄」
劉翔日前同俄羅斯女子撐竿跳好手伊仙芭耶娃（左）一齊出席記招，「女鳥人」做慣主角，但拍埋劉翔度就做咗「大茄」。記者總共問咗8條問題，有5條係問劉翔，向伊仙芭耶娃提出嘅只有3條，而呢3條問題都係喺組委會工作人員一再要求下，先至有記者提問。
申花中超提前開波
上海申花喺今日嘅中超比賽會主場對天津泰達，但係比賽時間同上海國際田徑黃金大獎賽嘅時間撞到應。申花明知撼唔贏劉翔，為咗票房同埋收視率，決定將比賽時間提前3粒鐘左右，由原定嘅晚上7點45分改為喺5點正開波。