解放軍營向來係機密禁地，閒人免進，駐港部隊特別同迪士尼樂園安排米奇、米妮入營，唔係去勞軍，而係同近百個小朋友及長者慶祝10.1，點知兩隻洋老鼠好大牌，要成班人等佢哋大半個鐘頭先出場，烈日暴曬之下，連慶祝國慶60年個蛋糕都熱到溶咗！
師奶怒鬧：早知唔嚟
有人話香港「割地」興建迪士尼係喪權辱國，今次象徵美帝消費主義嘅米奇、米妮破天荒深入解放軍軍事重地，全港愛國人士唔知有乜感受，八方就覺得好「㷫」，事關噚日一早已酷熱警告，據講昂船洲軍營露天更高達攝氏37度。參與活動嘅人9點左右就到齊，但等足大半個鐘頭活動先正式開始，現場有個師奶熱到一頭煙，「早知唔嚟！」
現場消息話，活動略為延遲，係因為有「重要嘅人未到」，噚日最重要嘅除咗兩隻洋老鼠，就係部隊少將，由於邊個唔準時可能係國家機密，冇人夠膽亂講。人肉佈景板曬到暈，八方在場採訪女同事都有啲中暑，連準備在儀式上切嘅大蛋糕都頂唔順，蛋糕上有朱古力數字「60」，兩個字慘受烈日煎熬熱到軟化，工作人員即時拎走。
好彩人民子弟兵久經訓練，表演軍操時依然虎虎生威，砌出「1949」、「2009」同「中華」幾組字時整齊有序，冇丟架。中國人民被外人屈辱夠了，獲邀到場嘅羅婆婆係共和國同齡人，佢話見到解放軍咁嚴明感到好光榮，12歲讀中一嘅梁虹第一次入解放軍營，大讚威武之師好嘢。
10歲讀小五嘅余世澤卻有啲失望，原來佢以為今次駐港部隊開放軍營，會好似北京大閱兵咁，大晒冷解放軍高科技軍備，可惜只係招呼大家參觀軍人宿舍四圍睇睇，冇乜好犀利飛機大炮亮相。對軍備咁有興趣，余世澤日後係咪想參軍呢？佢好老實咁講唔想當兵，因為做軍人成日要暴曬，見到都驚，唔使預佢。
mailto:[email protected]
