台灣行政院院長吳敦義在台灣宣佈內閣改組之前，在九月五日訪港，據說係「秘密」行動，俾民進黨大肆批評，又指吳敦義來港，竟然求見「下一屆香港特首熱門候選人梁振英」，事有可疑，為投誠報備云云。台灣又有人跟民進黨癲，指吳敦義誠信有問題，我哋隔岸觀火，就覺得台灣一啲政客水平好低，民進黨擁躉嘅水平更差，令人搖頭。台灣有時候號稱「博士治國」，內閣人選擁有博士學位者，隨時有十個八個起碼，但有博士學位嘅人，可能都係simpleandnaive啫噃！
第一，吳敦義若要來港請教山坡安全問題，使乜搵梁振英呀？香港有好多工程師專家與顧問，邀請工程師學會啲專家委員到台北一行，或嚟香港請教土力工程專家就得啦，中華旅行社在港多年，駐港台灣商人多的是，唔通佢哋一個人都唔識？梁振英係測量師，唔係泥土結構專家，問佢攞料，佢其實都係扮演中介人角色啫。國民黨啲智囊顧問打個電話畀中大亞太研究所副所長王家英問吓，已經一清二楚啦。
第二，梁振英亦不是「特首熱門人選」，大熱門仍然係唐唐，有民調為證，民進黨亂噏，呃台灣無知人士啫。
第三，民進黨質問點解吳梁二人見面要在香港會咁高級，真係大鄉里之至。香港會勝在夠高檔，內無閒雜人等，即使荷李活大明星入內，亦唔會有人要求簽名，吳梁二人及吳敦義家人不一定要到茶餐廳嘅啫。
第四，吳敦義與佢嘅台大校友郭炎即使在鏞記吃飯，咁又點？話郭炎係政協喎，唓，左丁山有大把朋友/校友係人大代表、全國政協，平時一齊吃飯，唔會覺得佢哋係甚麼大人物，平輩而已，如果話同政協食餐飯都係新聞，台灣人就識見淺薄矣。
成單事件簡直係庸人自擾，無知嘅民進黨搵政治着數啫，咁啱吳敦義又夠晒笨，當初行程保密，事後應對有誤差，於是小事化大，變成係吳敦義講大話。台灣人法治意識不張，阿扁判監後，居然有民進黨擁躉威脅法官安全，可見呢啲人幾咁教育水平低。龍應台不如返台灣演講多啲，宣揚吓香港法治文化！