今屆港姐被標籤為史上最醜，負面新聞無日無之，日子有功，反令佳麗們學懂處之泰然。就如冠軍劉倩婷和最上鏡小姐袁嘉敏無懼斷背傳聞，公開互讚；亞軍李姿敏和季軍熊穎詩則為美麗定義平反。人說今屆港姐質素低，但EQ肯定最高。 撰文：陳寶明
冠軍劉倩婷解構斷背情
冠軍劉倩婷在參選期間被指雙性戀，又傳過她被騙墮胎，又指她的家庭背景複雜，還有個同母異父的10歲弟弟，身上孭着沉重負面大包袱，但她卻冇有怕，我行我素，怎樣被人講也好，總算摘得后冠而回。
承認同性朋友多
早前有指最上鏡小姐袁嘉敏在網誌內向劉倩婷示愛，劉倩婷爽快地說：「我哋冇乜關係微妙，因為我哋喺日本同房，佢好勇於講自己嘅事，咁佢信我先講，我哋互相信任，佢好口密又唔造作，好有智慧。」
劉倩婷承認身邊同性朋友較多，甚少異性朋友，但她不會因為闢謠而覓男友，她說：「隨緣啦，單身貴族有乜唔好？」她自言享受被人錫的感覺，雖然屢傳斷背緋聞，但她與英國密友KittyChan和另一密友TracyTong為保友情，仍有聯絡。
月入數千靠積蓄
劉倩婷參選前曾在英國任職證券分析員，她覺得經濟是由人去控制，早前她更重本投資，她說：「我買啲股可以長揸，我最睇好樓市，返嚟香港我同媽咪夾份趁低買咗間樓收租。」在英國生活10年，月薪可觀，但成為港姐後卻只月入數千元，她自言幸有積蓄，未至於入不敷支。
今屆港姐被指是美麗終結，劉倩婷謂一直對自己蠻有信心，從沒質疑過自己的美貌，如今得獎更添自信。
亞軍李姿敏：攬仔≠豪放
亞軍李姿敏被曾志偉封為最無料港姐，又被外間冠以隱形佳麗無人識，是因為她沒有特別新聞可言，如今突然奪亞，眾人也目瞪口呆，所謂沒有新聞即沒有價值，她大方笑說：「呢啲各有唔同觀點，證明我得亞軍唔係靠新聞。」李姿敏是新聞指數最低的一個，只有一宗在網上被揭豪放攬仔實錄。
「玩都要有儀態」
來自美國紐約的李姿敏，自覺與男性朋友攬抱也是一般正常社交，她說：「我唔係隊酒爛蒲嘅人，又唔係豪放女仔，我好傳統o架，玩都要有儀態。」
不經不覺李姿敏當選港姐已近一個月，她已習慣港姐身份，雖然參選期間眾佳麗被指醜樣，收視也跌至低點，但她一臉自信說：「我冇唔開心，觀眾會睇到，我唔會因為咁打擊信心，我覺得自己好靚。」對於被彈腰粗，她笑笑口說：「條腰粗咗啲，有啲肥，我減緊喇！」她不求十全十美，只求夠均勻。
李姿敏現在仍是一位學生，尚欠一個學期的課程，今次是得到學校的支持才有機會參選，她雖然要在港履行港姐責任，不過還會繼續遙距進修。
季軍熊穎詩：我有Model唇
港姐季軍熊穎詩最多花名，她憑着厚厚嘴唇及唇毛而被冠以孖膶白歆惠、生鬚舒淇、鬚根舒淇、翻版舒淇之名，她似乎與舒淇特別有緣。對於花名她表示不會介意，又不是她一個有花名，是人人有份嘛！她說：「冇人話我個嘴唔靚，都有人讚我靚，有人話係model唇喎，外國啲model嘴唇都差唔多咁。」
「我雙眼幾迷人」
熊穎詩很欣賞舒淇，她說：「佢好靚，不過我冇舒淇啲味道，我嘅唇形較舒淇厚，我覺得自己性感地方除咗嘴唇，就係雙眼，幾迷人呀，我啲五官分開睇唔算太突出，但係拼埋一齊就幾靚，我塊臉幾平均，上鏡瘦會好睇啲。」
正當熊穎詩自讚擁有一雙迷人大眼，看清楚她的左邊眼角下有一粒淚墨，原來她有想過脫掉它，她說：「我有考慮過脫墨，不過怕有疤痕。」
熊穎詩曾任市場助理，以前有穩定收入，但貴為港姐卻只得「雞碎」收入，她說：「家收入係減少咗，不過我嘅生活冇問題，我有積蓄嘅，大個女要靠自己。」她慶幸有家人在經濟及精神上支持，因為要趁後生要多接觸新事物，才不枉此生。
最上鏡小姐袁嘉敏：年紀大輸蝕
通常最上鏡小姐十拿九穩也順利打入三甲，不過袁嘉敏例外，她坦言：「我都有咁諗，我以為自己入三甲，因為我見到朱玲玲，好想佢幫我加冕，不過後來見劉倩婷得冠軍，我都戥佢開心，因為佢人品好好。」
最怕陳可辛
下月袁嘉敏便25歲，現在才入行可會是遲來的機會？她說：「我都知，再由頭做起要一、兩年時間，年紀係大咗，有啲輸蝕，但係我又唔會走o靚模路線，我走高貴路線嘅。」她自爆原來一直想做幕前工作，只是她心廣體胖，重約130磅，原來她在澳洲讀中學已是肥妹仔，至參選港姐才減肥，現在105磅。她返港後為亞洲電影大獎工作，其間結識了導演陳可辛，最後還邀她做秘書兼助手，她隨即為電影《投名狀》投入幕後工作。
貴為上鏡小姐，袁嘉敏可會向前老闆陳可辛自薦拍戲？她笑說：「如果有合適角色我諗佢會搵我，但係呢一年要做港姐工作，未必有時間拍戲。」她以前還是陳可辛助手時，對他驚得要死，因為他的樣子好cool，現在大家不再是賓主關係，反而做到好朋友，她說：「我好怕佢，對住佢反應要好快，稍為慢啲就俾佢窒。」結果在陳可辛和吳君如推波助瀾下膽粗粗去選港姐。
袁嘉敏自言天生男仔頭性格，並嫌自己不夠女性化，可能是她太爽直，對於早前被指在blog上向劉倩婷示愛，她連聲笑說：「我哋係好姊妹，Iloveherasafriend，入行好難搵真正好朋友。」
