【本報訊】港區人大代表日前集體縮沙，拒絕聯署去信中央要求跟進新疆武警先打後屈本港記者，昨日再有人大為新疆政府暴行解畫，指內地新聞自由已相當開放，「如果唔開放，你哋呢啲（新疆武警打記者）消息根本出唔到」，又強調一眾人大現時最關注，並不是本港記者遭疆官被屈被打事件，而是「點可以好開心，平平靜靜咁過十．一」。有泛民議員直斥該名港區人大言論可恥，「佢講嘅根本唔係人話！」
「我哋關注平靜過十．一」
港區人大代表費斐昨日形容先打後屈本港記者的內地官員，「較強調國家利益，從整體利益出發」，指自己思維亦一樣，「我哋嘅培訓、思維，就係一切以大局為重」，她指港人應在中共慶祝建政六十周年前，以「平常心」看待記者被打事件，「我哋家關注嘅焦點，係點可以好開心，平平靜靜咁過十．一」。
費斐又稱，內地新聞自由已相當開放，「如果唔開放，你哋呢啲（新疆武警打記者）消息根本出唔到」，美國警方更可在毫無理據下槍殺記者，「我喺美國讀過書，知道佢哋警察暴力都好緊要，佢哋唔理三七廿一，可以一槍嘭咗你！」她又坦言毫不擔心人大拒絕聯署會令港人感到失望，「我無乜所謂，因為人民代表制度唔係喺香港實行，我哋發揮嘅作用係有限，我哋最大責任係參與國是」。
職工盟立法會議員李卓人炮轟費斐的言論可恥，「佢講嘅根本唔係人話！只識為屈記者、打記者嘅疆官塗脂抹粉，為咗所謂國慶，連做人基本尊嚴、價值都可以埋沒！」他認為港人不應再對港區人大存在任何期望。