【上月燈神】
收費台近排重播酒井法子套《同一屋簷下》，等大家緬懷一下佢未變毒女之前嘅玉女樣。所謂十年人事幾番新，喺嗰班有份做嘅演員當中，只係得番做大佬同二佬嘅江口洋介同福山雅治可以紅足咁多年，但係做佢哋細佬妹嘅石田壹成、大路惠美同埋山本耕史就一個個摺埋，真係令人欷歔。仲記得客串演出嘅內田有紀同埋松隆子當年亦紅極一時，身邊唔少朋友都係佢哋嘅「粉絲」，雖則不至於好似石田壹成佢哋咁兜踎，不過亦喺日劇界消聲匿跡，漸漸遭人遺忘。
喺藝能界，唔努力同埋有乜行差踏錯，隨時由天堂跌落地獄。球壇亦一樣，今日係明星，聽日分分鐘變暗星。好多剛30出頭嘅巨星級球員，因爛蒲爛滾，搞到唔可以再喺歐洲頂級聯賽立足，所以我即使唔係傑斯嘅「粉絲」，但見佢可以由17歲踢到35歲，而且仲可以效力曼聯兼做埋隊長，真係要寫個服字畀佢。禮拜日曼市打吡戰，曼聯同曼城都要挫對方銳氣，唔慌冇入球，就要入球「大」。
青蛙仔
近5場往績：WWWWL
大細：曼聯（大）
心得：兩隊嘅攻力都有番咁上下