雷曼倒閉，轉眼間過咗一年，對好多投資銀行家嚟講，真係往事如夢，黃金夢醒之後，唔好彩者，失業到家仲係周圍撲，搵食艱難，老資格者如是，年青新入行者何嘗不然。肥仔K在日本畢業後，曾見過東京雷曼，記得雷曼高層滿口社會責任、環保意識，完全唔係講銀紙那麼庸俗，肥仔K結果見工不成，雷曼唔睬佢；點知事隔三個幾月，雷曼就執笠，遺下一大堆蘇州屎，都唔知乜嘢叫做社會責任。肥仔K一位朋友讀書叻佢好多，牛津畢業，再到MIT攞碩士，雷曼爭住請，但上班未夠半年，已經失業，人哋話曾經滄海難為水，呢位才俊就不能忘懷短短半年嘅威風、威水，至今仍然唔肯「低就」，好彩老頭子係有銀士啫。
賓架W請食飯，佢位公子自倫敦回來做暑期工，做足三個月，十分勤力。倫敦大學十月先至開學，冇計啦，仲有時間去希臘行吓先至返倫敦。問公子W在一間商業銀行（唔係老頭子嗰間）做啲乜，佢話學吓乜嘢叫做L/C、D/A、D/P，Collection等等，咦，呢啲係押匯部基本工夫，唔多時興咯喎，用佢嘅術語講，唔夠sexy唔夠exciting，點似得啲同學講M&A、IPO、MBO咁高級呀！賓架W教仔：「唔好一步登天，我當年做見習生就係學習開L/C嘅嘞！」公子W話一啲同工（即暑期工）係大學尖子，久唔久就呻話做商業銀行冇出息，畢業後點都要考「投行」。公子W問尖子：「咁你又唔去高盛做intern？」尖子答：「我都唔明白高盛點解唔請我！」公子W又問：「做投行有乜好處呢？」尖子答：「夠威囉，實會震動同班、同系，大學會叫我去見記者做宣傳，而且人工高、花紅厲害噃！」我哋班老鬼聽公子W講故事，都忍唔住笑。賓架C講：「我曾介紹名門之後去見一位已過身嘅投行猛人G，猛人G坐在大班椅，雙腳伸在枱上面，名門靚女入到去坐低，只見到猛人G對鞋底，說話俾猛人G窒到暈，名門靚女之後死咗條心，話唔想再與一啲沙塵到好似係上帝嘅人做同事！」識諗或者會係咁，喜歡講錢講威嘅年青人，仍然會發夢衝埋去。（作者更正：昨日〈再有私有化〉一文，「……無流動性，有息派……」一段應為「……無流動性，『兩年冇』息派……」，見諒。）