【東京直擊】後生的女模，簡稱為o靚模，被人認為是上不到天橋行騷的model。同樣以年輕、可愛娃娃臉做招牌的Angelababy，自封潮模，成功打入日本市場，參加青春服的時裝騷，同行還有對這個市場虎視眈眈的o靚模，要下一站成為天后，Angelababy當然要下苦工，在日本積極進修。不過獨自在日本生活的她有時也覺得寂寞，渴望緋聞男友陳偉霆來探班。 撰文：王連連
唔辛苦點得世間財，Angelababy（楊穎）出道日子尚淺，成為香港模界新貴。當一班o靚模急趕直上，花盡心機追近Angelababy的步伐，同樣參加「ToykoGirlsCollection」天橋騷。不過，Angelababy先拋離周秀娜、諸葛梓岐，跟日本名模渡邊知夏子、藤井Lena、長谷川潤等人睇齊，同穿五套衫行騷。其實Angelababy已簽約日本avex，在日本日漸被人認識，工作開始排得密麻麻，除了已為多本日本雜誌影相，又跟日本男藝人拍MV，更成為日本大型百貨公司Lumine的廣告女郎，早前已拍攝廣告照，大型海報於本月尾便掛在位於新宿的商場外牆，認真架勢。
每月赴日進修
不過Angelababy亦不敢怠慢，密密練習務求做到多樣化的女模。她早前在位於南青山的日本經理人公司Avex總部接受訪問時說：「公司安排我學唱歌、跳舞、行catwalk，遲啲仲會出唱片。睇吓香港有乜嘢工作，通常隔個幾星期或者20日就嚟一次日本，每次嚟都會上堂學唔同嘅嘢。」普通人去日本最主要是逛街購物，但Angelababy就只能在排練室教練唱歌及行catwalk，她說：「好辛苦o架！每一日做嘢都做唔晒，通常每日都要影雜誌相，所以只可以上堂學一樣嘢。」
雖然辛苦但Angelababy陸續收到回報，她高興地謂已漸漸有日本人認識自己，她說：「我有日出街，第一次有人認得，有個日本女仔行埋嚟問我係咪Angelababy，仲同我影合照。真係嚇一跳，估唔到咁快知我係邊個。」而且這麼多工作，收入應該也會增加：「咁辛苦，收入同做嘢又真係成正比嘅。」
未有真正朋友
為了工作要穿梭兩地，Angelababy和緋聞男友陳偉霆（William）見面機會減少，未知男方會否有投訴，Angelababy含羞地說：「佢有朋友嘛，如果佢嚟玩都好歡迎嘅，或者嚟探班，但我或者冇乜時間。」至於會否打算跟William組情侶檔於日本一起發展，Angelababy笑着說：「應該唔到佢話事，唔知佢公司會唔會，但如果佢真係嚟埋就更開心啦！喺日本我未有真正嘅朋友。」
潮模育成班
每次Angelababy去日本都要跟導師學藝，歌舞catwalk樣樣齊，就是為了在日本時裝界及藝能界闖出名堂。
復出Leah賞識Baby
要進攻日本女模市場，Angelababy採用親和態度。她學足日本女模，做了個人網站，網誌以英文和簡單日文記載生活點滴。為廣結良朋打好關係，她說：「之前都識呢邊嘅模特兒，但係簽咗公司，就少咗同佢哋聯絡。每次出席活動，公司都會介紹藝人同事畀我識，但一下子未必記得晒。」她最欣賞日本三姊妹model的妹妹道端Jessica，她說：「我為個騷試身時見到佢，希望到時可以有機會見面合照。我覺得佢個樣好似張栢芝，佢係我好多年嘅女神。」
於東京行騷的後台，產後復出的混血女模LeahDizon，她與Angelababy可謂惺惺相惜，Angelababy說：「我哋喺一個活動見面，佢過嚟搵我，唔知佢係咪認錯人呢，佢話喺日本見過我，好想同我合照。不過我哋冇交換電話，等遲啲熟少少先。」LeahDizon在網誌，大讚Angelababy可愛有禮貌，更稱她為topmodel。
