金融海嘯一周年，經濟版無甚動靜，大家繼續吹水預測個市會升到幾點。唱好派聲大夾準地告訴投資者，有內地巨資撐場，股樓可以升到無人信。
海嘯的重創，因人而異，但一年已經將教訓拋諸腦後，香港人未免善忘到畸型的地步。香港是最識走位抓銀的城市，總括金融海嘯的教訓，唔使問任志剛，問一下自己，做一次周年年結，你或許會發現：
安身立命，專家跟天文台一樣，一出聲就令交通大亂，最好唔聽佢點，平時做足防風防水防斷電斷糧的逃生準備。
居安思危太抑鬱了，自覺居安者，放心居安下去，不必疑神疑鬼，一動不如一靜。幾時思危好呢？有危必有機是害到人雞毛鴨血的廢噏，有機時，就是思危的適當時間。諗諗，你又唔係下屆特首大熱門，點會有咁筍的交易益你呢？
輸錢以後你再難相信經紀、銀行、股票分析員以至熟人朋友，well，這樣反而過了耳根清靜的一年。少吃喝應酬，多運動沉思，這樣過冷河你本來以為會好慘，但今日發覺，自己像麵條那麼爽。咁，試問還有什麼理由，會令你再次跳落滾水自淥？