【上月盟主】
上周命中重心廣島三箭主W，但總結仍要輸錢，只怪自己心雄，放太多注碼在過關同波膽上，實在抱歉；檢討得失後，今周決定集中火力在法甲周日大戰巴黎聖日耳門對里昂身上，平手盤追里昂。
里昂年輕小將紛上位
賭波有時都幾講緣份，里昂呢隊波都算利我，周中歐聯主場擊敗費倫天拿，替我中條2串1，今次回師本土聯賽，里昂作客同樣有份量嘅聖日耳門，難得唔使讓波，以里昂今季各項賽事未嘗一敗，當然要追。
里昂今季雖然走咗賓施馬，但簽入利辛度盧比斯、巴菲迪比高美斯、米高巴斯圖斯等貴價貨，感覺攻力更加平均。難得陣中年輕主力已經上位，中場比真歷頂替祖連奴比南布肯奴位置，又喺歐聯入波；門將洛里斯晉身法國1號門將，其他骨幹如桑馬干、杜拿蘭又處於當打期，唔怕連番大戰。
講往績，聖日耳門對里昂唔失禮，上季主場更以1:0擊敗對手；但要留意，呢場波喺上季季尾進行，當時里昂「立立亂」，輸埋畀聖日耳門後，更差不多決定衞冕無望，呢次里昂個勢返晒嚟，唔報仇勢係假。而且聖軍今仗仍有土耳其前鋒艾丁缺陣，季初佢哋有咁好成績，多少因為呢個新加盟前鋒，上仗佢一缺陣，即刻作客輸畀摩納哥，今次主場都難保不敗。
飛腳平手超筍捧硬
周六另一場平手盤繼續捧客隊，就係日聯賽事，FC東京主場對大阪飛腳，點計都要客軍；FC東京淘汰心跳殺入日聯盃決賽後，似乎對聯賽冇乜動力，上仗面對同級對手京都不死鳥都輸波；飛腳仍有後上爭標希望，近8場聯賽僅輸過1場，平手盤撐得過。
牽牛
近5場往績：WWLLW