33歲的側田和舊愛林苑分手一年，但身邊女伴卻頻頻換畫，繼模曾雪華和TVB「粉」女黃欣後，前晚他又拖長腿新歡四圍去，先遊迪士尼樂園再到銅鑼灣掃碟，不過側田超級黑，竟連環撞正記者，搞到爆而逃。
側田愛蒲愛玩更愛媾女，雖然禿頭又其貌不揚，但勝在冧女有道。去年10月他才自爆失戀，暗示與林苑玩完，不過其精采感情生活年中無休，o靚模曾雪華（Eugene）和《美女廚房》中的「粉」女黃欣霎眼過去，近日他又有貌似譚凱琪（Zoie）的長腿女伴新登場。
遭撞破感尷尬
昨凌晨12時許，戴cap帽配一身黑衣的側田和長腿新歡現身銅鑼灣景隆街，初時二人行到離行離列，至步入附近一間VCD舖後，瞬即黐埋揀碟。手拎一袋迪士尼戰利品的長腿新歡皮膚白皙，穿T恤襯短褲露長腿，標準身形一覽無遺，難怪側田不時望着她咪咪笑，但同時他也高度戒備四圍望，發現記者後即面露尷尬，最後硬着頭皮走出店外，主動跟記者拉東講西。
側田問記者：「搞乜呀你哋？」有記者笑說：「搞你呀！」其實記者是採訪正在附近拍戲的陳奕迅，但媾女媾到盲舂舂的側田卻撞入記者範圍，故他得悉後一臉無奈，有女在旁的他如被蟻咬，身勢、伸脷嘟嘴又喪豎拇指，小動作甚騎呢。
自揭同遊樂園
問到長腿新歡是否其女友，側田馬上搖頭說：「唔係，你影我算啦，唔好問我啦。」他又開始亂噏，自讚主演的《保持愛你》VCD好賣及男主角有型，又自爆剛才拖女去迪士尼樂園，他說：「去咗迪士尼，諗住冇人，原來百幾個記者喺裏面，有個新鬼屋launch。」側田女，但一日之內兩度撞入記者堆，都算當黑了。
隨後側田和長腿新歡嗱嗱臨買兩隻碟，由男方付款，兩人離開店舖時，側田便由保持愛你變成保持距離，並火速與長腿新歡跳上的士離開。
採訪、攝影：黃文偉、朱志聰
