「巨無霸」奧尼爾一連6集嘅真人Show《Shaqvs》，剛喺周二播出佢同美國「飛魚」費斯嘅游泳對決。勢估唔到係奧尼爾喺第1回合就先聲奪人，爆冷游贏費斯，當然「新水怪」有讓賽啦！最後費斯使出真實力先反敗為勝，奧尼爾呢次都算威威囉！
第1回合爆大冷
身高7呎1吋、體重至少325磅嘅另有稱號「鯊魚」的奧尼爾，喺籃球場上憑籃底進攻同入樽所向無敵，堪稱NBA嘅「暴力與美學」混合體，之不過原來「鯊魚」嘅泳姿有番咁上下，難怪夠膽挑戰費斯。「鯊魚vs飛魚」9月初喺巴爾的摩嘅LoyalaUniversity游泳館舉行，當日館內座無虛席，爭勝心爆棚嘅奧尼爾當然唔放過攞威機會，結果喺3盤2勝制嘅第1回合，就爆大冷喺自由式贏咗費斯。咪拍手住，事關費斯雖然提前5秒出發，不過就要游足50米，相反奧尼爾淨係游25米就得，難怪以23秒14勝出啦！
到第2回合嘅200米混合4式接力激鬥，奧尼爾拍住3名美國現役女將，包括世錦賽女子100米蛙泳金牌嘅美國泳手桑妮、背泳選手古歌絲同埋蝶泳嘅禾美雅，奧尼爾就自已游最後一棒。奧運累計攞咗14面金牌嘅費斯，當然唔可以咁易畀人K.O.，結果佢游出1分54秒25成績，比佢嘅世界紀錄僅慢0.02秒，贏咗之後仲唞晒大氣，睇嚟無論係陸地定水中，「鯊魚」畀對手嘅威脅都一樣咁大！
終落敗受罰戴帽「炸水」
雙方鬥成1:1，要決勝局分勝負；兩大猛將為咗顯示實力，仲唔着高科技泳衣，僅穿三角泳褲出戰，今次費斯要游75米，奧尼爾就游50米。只見比賽一開始，奧尼爾就變咗一個「黑影」咁快，最終游出38秒76，較費斯慢咗只係0.17秒。本來輸咗就要喺「大懲罰」表演韻律泳；但搞鬼嘅奧尼爾一於少理，乾脆戴上粉紅色泳帽表演高台「炸水」，搞到費斯同現場觀眾笑爆嘴。又好波又識撈，難怪縱橫NBA18年嘅「巨無霸」咁受球迷愛戴啦！