讀者來電郵問及鄭大班：「美國大學最新情報一文，在那裏發表？」答案係《信報》。鄭大班推介聖母院大學（NotreDame）與南加州大學（USC），其實係佢兩位公子入讀之私立大學，甚有名氣。聖母院大學今年頒授榮譽博士學位畀新科總統奧巴馬，校園內有學生組織抗議示威，理由係聖母院是天主教大學，天主教素來反對墮胎，但奧巴馬大力支持墮胎，故此學生認為即使奧巴馬係總統，都唔應該得到聖母院大學榮譽博士學位。呢類事情，自不然係抗議無效，學位照頒，之後再冇人嘈。聖母院以美式足球揚名，記得有一套電影就係以聖母院足球隊為背景嘅，雖然呢間大學已經有好多年未得過全國大學足球冠軍，但餘威猶存。
鄭大班來電通知，佢今星期再在專欄講加州大學，痛陳利害咁講，對美國大學有興趣之家長/學生，不如留意明天《信報》。與美國啲一般州立大學比較，本港大學其實有過之而無不及，起碼讀書冇咁貴先。教授L自美國來電郵即傳來最新資料，加州大學（UniversityofCalifornia）因州政府冇錢，大削大學經費，加大被逼增加學費，在二○一○年初季實行，加幅達到32%，本州學生一年學費超過一萬美元，同時會考慮削減學額三千三百個，十間分校又裁員一千九百人。
加州大學學生會代表話，加費之後，有好好好多學生負擔唔起學費，我地要知道，加州學生交一萬美元已經鬼殺咁嘈，國際學生其實要交多好多，起碼要兩萬幾三萬美元，更加肉痛，未來數年，加州大學會（一）減人工，（二）加學費，（三）削學額，（四）裁員，你話間大學仲會唔會有士氣，教授有冇心機教書吖！
相形之下，香港就好得多，有錢資助外國精英學生來港讀博士學位㖭，明年開始每年收一百三十五人，以讀三年為限期，每人每月可得獎學金二萬元，以十二個月計，如果三年內收足405個學生，即每年支出九千七百二十萬元，但可以收回學費及宿費大概約每月五千元，即二千四百三十萬元，每年淨支出唔使一千萬美元。適值美國州立大學冇錢，私立大學投資虧本要削支出，香港依家推出博士研究生計劃，對外國研究生應有吸引力。