香港人好鍾意喺新正頭攝太歲趨吉避凶，新界人更加相信呢種傳統智慧。大埔林村鄉公所好體貼，覺得僅僅一棵許願樹都滿足唔晒市民嘅願望，決定喺許願樹附近整十二生肖像，等市民農曆年去林村掟寶牒時，順便攝埋太歲，咁就一舉兩得。
加種中國櫻花
林村鄉公所副主席陳灶良透露，十二生肖像最快年底落成，趕及畀市民喺虎年攝太歲。不過仲研究緊，究竟用石像抑或玻璃纖維製作好呢？事關兩種質地都各有好處同壞處，真係十五十六。
鄉公所亦有意喺林村嘅空地種植20棵中國櫻花，希望將嗰度打造成新舊合璧嘅旅遊點。呢個計劃係聯同康文署一齊搞，成事機會相當高，一、兩個月後仲會有種植禮。早前亦有人提過喺林村空地建造沙灘排球場嘅建議，據知已經被否決咗。有村內人士話，鄉紳向來比較傳統，覺得沙灘排球同林村唔多啱feel，亦有可能係驚咗o靚模着比堅尼入嚟打排球，破壞咗風水就唔好喎。