滙豐銀行經常擠滿人，最辛苦係一班公公婆婆。早喺舊年，滙豐喺人流最多嘅21間分行增設長者服務專櫃，每朝9至11服務，排隊時間慳3至5分鐘，噚日滙豐宣佈一系列加強社區銀行服務措施，長者櫃位會推廣到全線100間分行，服務時間延長至全日，有望慳多啲時間。
排隊時間可再縮短
獅子行噚日喺人流最多嘅20間分行，派出「社區關愛大使」照顧長者、傷殘同埋有特別需要人士，10月底加設「社區關愛坊」，提供所有社區銀行服務資料。
除咗照顧老弱人士，如果你係滙豐「目標儲全保18」或「教育樂全保」保單持有人，即使失業都唔使擔心供唔掂份子女保險，因為只要連續失業至少30日，就會獲得1萬蚊保費津貼代交保費。滙豐香港區個人理財業務零售網絡主管韓克強話，呢啲措施絕對冇加重銀行成本，希望同香港一齊共度時艱咁話。