雷曼爆煲一周年，唔少人對舊年發生嘅事仍歷歷在目，股神畢菲特亦趁呢個經典時刻自爆一件驚為天人嘅事，原來雷曼之死因係關乎一個留言服務！
話說畢菲特舊年收到英國巴克萊主席Diamond嘅電話，內容大致話巴克萊有意思做白武士救雷曼，希望股神擔保，當時股神叫佢fax資料畀佢過目，點知一直未見有fax。
畢菲特：搵我唔好靠手機
事隔一年，謎底終於解開！原來之後Diamond打電話畀股神，已經留言講晒啲資料畀股神聽，不過，直至雷曼「死咗」幾日，股神先發現手機有啲符號，佢問寶貝女Susan先知原來佢有幾個未聽嘅留言，其中一個正係Diamond，股神好抵死咁話，要搵佢就唔好靠手機啦。
不過大家唔好驚訝，股神確係如假包換嘅「科技盲」，因為佢一直強調自己睇唔透科技股，所以唔會投資科技業，佢曾經為避開01年科網泡沫爆破而沾沾自喜，睇番巴郡手上揸嘅貨，都係通用電氣、可口可樂、卡夫同富國銀行呢啲傳統行業，真係無一隻係科技股喎！
李華華
mailto:[email protected]