黃長發和鞋王三奶Karen打得火熱時，坐靚車住大屋，至3個月前這段不倫戀玩完，上月他終於脫離無業游民一族，在其契媽Christine打本的法國餐廳任職助理經理。不過前日風雨交加，打躉店中的發仔雖然拍足一粒鐘烏蠅，但仍落力拖地抹碟倒垃圾，收工後則搭港鐵返美孚老家，重過慳家生活。
黃長發與Karen（李姿霆）甩拖後，即與契媽Christine（劉嘉瑜）頻密交往，上月他更在契媽投資、位於中環的法國Cafe「SaveurdeFrance」任職助理經理，24歲的發仔搣甩孽戀後重過新生，在店中事無大小一腳踢，即使前日風雨飄搖，致店舖生意大受影響，但發仔仍披上圍裙戰衣如常看舖。
搭港鐵回家
24歲的發仔脫離藝員生涯後，狀態已不如選港男時的一身肌肉，且明顯發福。前日戴黑框眼鏡的發仔獨自打理餐廳，雖然當時正值放工繁忙時間，但因天氣惡劣，由下午6時開始，往後一粒鐘也沒有客人幫襯，不過他仍落力拖地抹碟及執垃圾，表現勤力。
約一小時後，發仔與兩名外籍店員一起收拾食物，取出櫥窗中的糕點放到另一端。未幾發仔除去圍裙、孭着背囊先行離開，步往港鐵站搭車往美孚。其間他戴上耳筒細細聲哼歌，又不停打短訊，表現輕鬆，落車後便返回與母親同住的萬事達廣場。
去年富貴過
發仔去年搭上鞋王三奶Karen時曾一度富貴，日日出入女方匡湖居大屋，更獲Karen揸靚車接送，當時他醉心媾女，對黯淡星途更不眷戀。不過這段不倫戀只捱了7個月，現時發仔雖被指黐實契媽打理餐廳，但他倒算打好呢份工，上至訂貨下至執貨執垃圾也親力親為。
採訪、攝影：李志明、黃曉程
